Dollar-ka oo Daciifay iyo Dahabka oo Jabiyay heer kii u sareeyay oo Halis Cusub ka Haysata Shirkadaha

Magaalada New York ayaa maanta la moodaa in aysan xabbadna ku dhicin. Suuqyada ayaa guuxaya, codadka falanqeeyeyaasha maaliyadeed waxay ka soo burqanayaan shaashadaha Bloomberg, CNBC, iyo Reuters. Warka ugu weyn ee isha lagu hayo waa laba. Dollarka Mareykanka oo mar kale hoos u dhacay heer la yaab leh, iyo qiimaha Dahabka oo jebiyay rikoor taariikhi ah, isaga oo gaaray heerkii ugu sarreeyay abid wax ka badan $2,750 halkii ounce. Laakiin dhinaca kale ee aan si weyn loogu jeedin waa saameynta arrintan ay ku yeelatay shirkadaha waaweyn ee loo yaqaan "luxury stocks" ama shirkadaha alaabta qaaliga ah, kuwaas oo dhawaanahan hoos u dhac weyn la kulmay. Haddaba, maxaa dhacay? Maxaa la filan karaa? Yaa guuleysan doona, yaase khasaaraya?

 

Waa su'aalo u baahan in si taxaddar leh oo cilmi iyo xog ku saleysan loo eego. Waxaan ku bilaabi doonaa dabagal taariikhi ah, marka xigtana waxaan u gudbi doonaa falanqeyn xeel dheer ah oo ku saabsan dhaqaalaha maanta, xiriirka u dhexeeya dollarka iyo dahabka, iyo sababta ay shirkadaha sida Tesla, Apple, Hermes, LVMH, iyo kuwa kale u wajahaan waqti adag.

 

Dollarka Mareykanka ayaa mudo sanado ah u ahaa tiirka ugu weyn ee dhaqaalaha caalamka. Waa lacagta keydka ah ee adduunka, lacagta ganacsiga batroolka, lacagta deymaha laga qaato, iyo lacagta dawlado badan ku tiirsan yihiin. Laakiin sanadkii 2024-kii ayaa ahaa xilli wax badan isbedeleen. Marka la gaaro April 2025, wax badan baa ka sii daray. Sicir bararka oo dib u soo laabtay, deymaha dowladda Mareykanka oo gaarey heer taariikhi ah, Fed-ka Mareykanka oo lumiyay kalsoonidii caalamka, iyo weliba cadaadiska siyaasadeed ee ka yimid Madaxweyne Trump oo markale ku soo noqodaye xafiiska, waxa yaabahani oo dhami waxa ay dhulka dhigeen kalsoonidii loo qabay dollarka Mareykanka.

 

Xaaladda cakiran ee siyaasadda Mareykanka ayaa ahayd mid xasillooni darro ku abuuraysa suuqyada caalamka. Madaxweyne Trump oo xukunka la wareegay bishii Janaayo 2025 ayaa bilaabay in uu cadaadis saaro Federal Reserve, isagoo dalbaday in la jaro ribada si u dhaqaaluhu kor ugu kaco  arrintaa si toos ah u dhaawacdaye kalsoonidii maalgeliyayaasha. Tani waxay horseeday in doolarkii hoos u dhaco, iyada oo maalgeliyayaashu bilaabeen in ay raadsadaan hantida dhabta ah sida dahabka iyo hantida sugan sida Franc-ga Swiss-ka iyo Yen-ka Japanese-ka.

 

Dhinaca kale, qiimahii dahabka ayaa si aad  ah u kordhay. Ma ahan oo kaliya in ay dad badan u arkaan meel ay lacagtooda ku keydsadaan, balse sidoo kale waxay dhabar jab ku tahay nidaamka lacagaha fiat-ka ee ku tiirsan kalsoonida dowladaha. Dadka wax falanqeeya waxay leeyihiin ‘’marka dollarku burburo, dahabka ayaa sare u kacaya  wax ka badan cilmi dhaqaale, waa dareen bulsho oo qoto dheer’’.

 

Shirkadaha qaaliga ah, kuwaas oo inta badan faa'iido badan ka hela awoodda wax iibsiga ee dadka lacagta badan haysta, waxay wajahayaan caqabado badan. Tusaale ahaan, shirkadda LVMH, oo iska leh noocyada Louis Vuitton, Dior, iyo Hennessy, waxa ay la kulantay hoos u dhac dhan 12% saddexdii toddobaad ee u dambeeyay. Arrintaan waxay si gaar ah u saameysay suuqyada Aasiya iyo Bariga Dhexe, halkaas oo dollar-ka hooseeya iyo qiimaha sare ee dahabka ay hoos u dhigeen awoodda wax iibsiga ee macaamiisha caadiga ah.

 

Apple, oo in kasta oo aan si toos ah loogu aqoonsan shirkad "luxury", haddana alaabteeda ay tahay mid qiimo sare leh, ayaa sidoo kale wajahday culeysyo cusub. Qiimaha wax soo saarka, iyo qiimaha qeybaha elektaroonigga ah, iyo ku kala duwanaanta suuqyada ayaa sababay in saamigeedu hoos u dhaco 8% toddobaadyadii la soo dhaafay. Tani waxay tahay calaamad muujinaysa in isbeddel weyn uu socdo, isbeddelkaas oo laga yaabo in uu dib u qeexo fikirka ganacsiga ee shirkadaha waaweyn.

 

Sida la ogyahay, suuqyada saamiyada ee caalamka ayaa si toos ah ula socda qiimaha lacagaha iyo dahabka. Markasta oo dollarku daciifo, ganacsatada waxay bilaabaan in ay ka guuraan hantida suuqyada maaliyadeed una guuraan hantida dabiiciga ah sida dahabka, lacagta, ama hantida dhabta ah sida dhulka. Tani waxay hoos u dhigtaa qiimaha saamiyada shirkadaha  waxaana si gaar ah u saameeya shirkadaha aan wax soo saarka aasaasiga ah lahayn.

 

Waxaa la isweydiinayaa: haddii dollarka uu sii daciifo, dahabkana uu gaaro $3,000 ama ka badan ounce-kii, maxaa noqon doona mustaqbalka shirkadaha sida Tesla, Hermes, ama Apple? Ma heli doonaan fursad ay kaga badbaadaan isbeddelkan?

 

Waxaa jirta suurtagalnimo ah in shirkadahan ay wajahaan laba dariiqo oo kala ah:

1.       Mid ay ku yareeyaan kharashaadka, una wareegaan suuqyo cusub oo ka fog suuqyada dhaqaalaha hoos u socda,

2.       Mid ay isku dayaan in ay sameeyaan isbedel qoto dheer oo lagu bedelayo nidaam ka ganacsigooda  tusaale ahaan, ku tiirsanaanta teknoolojiyadda AI ama deegaanka (green economy). Tani waxay noqon kartaa fursad cusub  laakiin sidoo kale halis weyn haddii aan si wanaagsan loo wajahin.

 

Xaaladda suuqayadd saamiyadd ee Mareykanka ayaa mid aan horay loo arag ah. Qiimaha shirkadaha "luxury" ayaa si joogto ah hoos ugu dhacaya, waxaana ka sii daran, ma jiro calaamad muujinaysa in dib u soo kabasho deg deg ahi dhici doonto. Dad badan waxay su'aal ka keenayaan Ma la gaaray waqtigii dahabka uu mar kale noqon lahaa hantida ugu weyn ee caalamka lagu qiimeeyo?

 

xigasho: Tradeveiw

Dhinaca kalena  waxaa jirta war wanaagsan. Dadka haysta dahab, ama kuwa maalgelinta ku sameeya hantida dabiiciga ah, waxay arkeen faa’iidooyin aan caadi ahayn. Waxay arkaan qiimaha hantidooda oo laban laabmay, kalsooni buuxda oo ay ku qabaan mustaqbalkooda maaliyadeed, iyo awood ay kaga adkaan karaan isbedel kasta oo dhaqaale ama siyaasadeed.

Hase yeeshee, dadka dakhligoodu yar yahay, ama kuwa ku tiirsan mushahar kaliya, waxay wajahaan dhibaatooyin aan la qiyaasi karin. Qiimaha badeecooyinka ayaa kacay, adeegyada ayaa qaali ku noqadye, lacagtooda ayaa qiimo beeshay, dhanka kale shirkadihii ay maalgelinayeen ayaa hoos u dhacay ku yimid. Su’aasha ugu weyn ee ay isweydiinayaan maanta waa Xaggee ayaan u soconaa?

 

Marka laga eego dhinaca siyaasadda, Dowladda Mareykanka waxay isku dayeysaa in ay xoojiso kalsoonida suuqyada iyada oo kordhisaye deymaha dowladda si ay u taageerto barnaamijyada shaqo abuurka iyo fududeynta maaliyadda, laakiin taasi waxay keentay in lacagta la daabaco ay noqoto mid xad dhaaf ah. Tani waa sababta ugu weyn ee dollarka hoos ugu dhacay, taasoo si toos ah u dhiirrigelisay qiimaha dahabka oo kor u kacay.

 

Marka la fiiriyo meesha uu caalamku maanta marayo, waxa ay u muuqataa in isbeddel dhaqaale oo taariikhi ah uu dhacayo. Waxay noqon kartaa isbeddel lagu tilmaami karo "dib u habeyn cusub" ama "xilli isbeddel dhaqaale", kaas oo beddeli doona habka ay dunidu u aragto lacagta, kalsoonida suuqyada, iyo cidda hogaamin doonta dhaqaalaha mustaqbalka.

Waxaan hadda joognaa meel ay dunidu dib uga fikireyso qiimaha hantida, awoodda lacagaha, iyo kalsoonida shirkadaha waaweyn. Waa waqti laga yaabo in uu yahay mid halis badan  laakiin sidoo kale waa fursad qaali ah oo loogu talagalay kuwa fahmaya halka laga guurayo iyo halka la hiigsanayo.